KRYEMINISTRI I SHQIPËRISË DHE KRYEMINISTRI I KOSOVËS PËRUROJNË TUNELIN E RRUGËS SË KOMBIT

-Kryeministri i Shqipërisë, Sali Berisha dhe kryeministri i Kosovës Hashim Thaçi, kanë përuruar tunelin në Kalimash, në rrugën Durrës-Kukës-Morinë, të djelën më 31 Maj, duke u takuar, në mënyrë simbolike, në mes të tunelit-

Vetëm 5 minuta nga mesdita, kryeministri i Shqipërisë, Zoti Sali Berisha, nga Thirra, dhe kryeministri i Kosovës, Hashim Thaçi, prej Kalimashit, janë nisur për të shënuar bashkimin simbolik mes dy vendeve.
I hipur në eskavator, kryeministri Sali Berisha shëmbi murin e fundit të betonit të tunelit Thirre-Kalimash, për t’i shtrënguar më pas dorën homologut të tij, Hashim Thaçi.
Gjithçka ishte pjesë e ceremonisë të jashtëzakonshme, që në rreth dy orë do t’i kushtohej tërësisht këtij momenti historik, siç dhe e konsideruan autoritetet e të dyja vendeve.

Në daljen nga Kalimashi, qytetarë të shumtë ishin mbledhur për të qenë dëshmitarë të kësaj ngjarjeje të madhe. Personalitete ndërkombëtare asistuan gjithashtu në ceremoni, mbesa e ish-presidentit amerikan, Ajzenhauer, diplomati amerikan i karrierës, i njohur për rolin e tij në çështjen e Kosovës, Uilliam Uolker.
Në daljen publike, me këtë rast, kryeministri i Shqipërisë, Sali Berisha, e konsideroi kryevepër të fushës së ndërtimit tunelin, sikurse dhe autostradën Durrës-Morinë.

Rruga Rrëshen- Kalimash, një nga projektet më të mëdha të qeverisë së Shqipërisë është konsideruar si vepra e shekullit dhe aorta jetike për të lidhur dy pjesë të kombit, Shqipërinë dhe Kosovën. Flamujt kombëtarë të Shqipërisë dhe Kosovës valëviteshin në këtë zonë, ndërsa një parrullë e madhe lajmëronte se me ndërtimin e rrugës Durrës-Kukës-Morinë distanca mes Tiranës me Prishtinës do të shkurtohet në 65 kilometra. Nga 330 kilometra që ishte distanca Tirana- Prishtinë, tashmë ajo do të jetë 265 kilometra dhe më së shumti atë e shkurton tuneli Thirrë- Kalimash, një vepër gjigande e ngritur mes shkëmbinjve që tashmë është shndërruar në një aks modern, 5.6 kilometra.

Shërbimet e Gardës së Republikës gjatë aktiviteteve të zhvilluara me rastin e përurimit të tunelit në Kalimash, rruga Durrës-Kukës-Morinë, më 31 Maj, u karakterizuan nga një dinamikë e shpejtë, si dhe korrekte në marrjen e masave për sigurimin e aktiviteteve të kësaj ceremonie.  Megjithëse masat e sigurisë për Kryeministrin  gjatë një aktiviteti me përmasa të mëdha vështirësohen mjaft,  strukturat e Gardës së Republikës në bashkëveprim me strukturat e tjera kishin marrë masat e nevojshme të sigurisë, pa krijuar kështu tensione, si dhe pa penguar punën.

Eksperienca e strukturave, grupit të shoqërimit bëjnë të mundur realizimin më së miri të detyrave.

U morën të gjitha masat e nevojshme, që takimi mes dy kryeministrave të ndodhte në pikën e takimit në mesin e tunelit 5.6 km të gjatë. Ndërkohë që shërbimet e sigurise teknike kishin marrë të gjitha masat për sigurinë e ceremonisë historike.

Në pritje të përurimit të krahut verior të tunelit Thirrë- Kalimash, pjesë e autostradës Durrës- Kukës- Morin në të dy anët e tunelit u mblodhën me mijëra qytetarë shqiptarë, gazetarë e deputetë.

Ndërkohë,  në datën 25 qershor, 3 ditë para zgjedhjeve parlamentare të 28 qershorit, u pre shiriti i përurimit të rrugës Durrës-Kukës.